ક્રિકેટર રિંકુ સિંહ સાંસદ પ્રિયા સરોજના લગ્નની તારીખ નક્કી: 8 જૂને સગાઈ, ​​​​​​રિંગ સેરેમની લખનઉની હોટલમાં થશે

Rinku Singh Priya Saroj Wedding date: તાજેતરમાં ઉત્તર પ્રદેશના રાજકારણ અને ક્રિકેટની દુનિયામાં એક ખાસ સમાચાર ચર્ચામાં છે. સમાજવાદી પાર્ટીના સાંસદ પ્રિયા સરોજ અને ભારતીય ક્રિકેટર રિંકુ સિંહ વચ્ચેના સંબંધો હવે સત્તાવાર બનવા જઈ રહ્યા છે. બંનેની રિંગ સેરેમની 8 જૂને લખનૌમાં યોજાશે. બંનેના લગ્નની તારીખ પણ નક્કી થઈ ગઈ છે. 18 નવેમ્બરે બંને સાત ફેરા લેશે. લગ્ન પહેલા 8 જૂને લખનૌની એક હોટલમાં બંનેની રિંગ સેરેમની યોજાશે, જેમાં પરિવાર અને નજીકના સંબંધીઓ હાજર રહેશે. જણાવી દઈએ કે આ વર્ષે જાન્યુઆરીમાં ક્રિકેટર રિંકુ સિંહના સમાજવાદી પાર્ટીના સાંસદ સાથેના સંબંધોની પુષ્ટિ થઈ હતી. બંનેના ગોળધાણા થઈ ચુક્યા છે અને હવે તેઓ સગાઈ કરવા જઈ રહ્યા છે. આ ભવ્ય કાર્યક્રમની તૈયારીઓ શરૂ થઈ ગઈ છે. સગાઈ અને લગ્ન બંને વિધિ પરંપરાગત રીતરિવાજો અનુસાર યોજાશે અને દેશની ઘણી મોટી હસ્તીઓ તેમાં હાજરી આપે તેવી અપેક્ષા છે. કોલકાતા નાઈટ રાઈડર્સના ડેશિંગ બેટ્સમેન રિંકુ સિંહ અને સાંસદ પ્રિયા સરોજના ચાહકોમાં તેમની જોડીને લઈને ભારે ઉત્સાહ છે. લગ્ન આઈપીએલ 2025 ના અંત પછી જ થશે, જેથી રિંકુ તેની બધી જવાબદારીઓ નિભાવી શકે.

► મછલીશહર બેઠક પરથી સાંસદ છે રિંકુની મંગેતર

રિંકુની મંગેતર સમાજવાદી પાર્ટી (SP) ની સાંસદ પ્રિયા સરોજ છે. 26 વર્ષીય સરોજે સમાજવાદી પાર્ટીની ટિકિટ પર મછલીશહર બેઠક પરથી 2024 ની લોકસભા ચૂંટણી જીતી હતી. તેમણે બીપી સરોજને 35850 મતોના માર્જિનથી હરાવ્યા હતા. પ્રિયા સરોજનો જન્મ 23 નવેમ્બર 1998 ના રોજ વારાણસીમાં થયો હતો.

► ત્રણ વાર સાંસદ રહી ચૂક્યા છે પ્રિયાના પિતા તૂફાની સરોજ

પ્રિયાએ નવી દિલ્હીમાં એરફોર્સ ગોલ્ડન જ્યુબિલી ઇન્સ્ટિટ્યૂટમાંથી પોતાનું સ્કૂલિંગ પૂર્ણ કર્યું. ત્યારબાદ તેમણે દિલ્હી યુનિવર્સિટીમાંથી આર્ટ્સમાં ગ્રેજ્યુએશન કર્યું. ત્યારબાદ તેમણે નોઇડાની એમિટી યુનિવર્સિટીમાંથી એલએલબીની ડિગ્રી મેળવી. પ્રિયા સરોજના પિતા તૂફાની સરોજ પણ ત્રણ વાર લોકસભા સાંસદ રહી ચૂક્યા છે. તૂફાની સરોજ હાલમાં સમાજવાદી પાર્ટીની ટિકિટ પર કેરાકટ બેઠક પરથી ધારાસભ્ય છે. તૂફાની સરોજે બંને પરિવારો આ સંબંધથી ખૂબ ખુશ છે અને લગ્નની તૈયારીઓમાં લાગી ગયા છે.

► મિત્ર દ્વારા થઈ હતી રિંકુ સાથે પહેલી મુલાકાત

જણાવી દઈએ કે પ્રિયા સરોજની એક મિત્રના પિતા એક ક્રિકેટર રહ્યા છે જેઓ રિંકુને ઓળખે છે. પ્રિયાની મિત્રના પિતાએ જ તેનો રિંકુ સાથે પરિચય કરાવ્યો હતો. પ્રિયા સરોજ ભારતની સૌથી નાની વયની મહિલા સાંસદ છે. જ્યારે પ્રિયા લોકસભામાં ચૂંટાઈ આવી ત્યારે તેની ઉંમર 25 વર્ષ, 6 મહિના અને 12 દિવસ હતી. રિંકુ સિંહે IPLમાં પોતાના જોરદાર પ્રદર્શનથી લાખો લોકોના દિલમાં સ્થાન બનાવ્યું છે. બંને એકબીજાને ઘણા સમયથી ઓળખે છે અને હવે તેઓ આ સંબંધને લગ્નના બંધનમાં પરિવર્તિત કરવા જઈ રહ્યા છે. એવા પણ અહેવાલો આવ્યા છે કે સગાઈ સમારોહ લખનૌમાં એક ભવ્ય સમારોહના રૂપમાં થશે જ્યારે લગ્ન વારાણસીની એક હોટલમાં થશે.